انتهى زمن الامتحان !!!

عن الالتزام اتحدث !!!....

فى اكتوبر الماضى دخلت امتحان GRE Computer Science و ده امتحان فى اساسيات علوم الحاسب مطلوب دائما فى اثناء التقديم للجامعات الامريكية للحصول على منحة دراسية للدكتوراة هناك ... حضرنا مقر الامتحان فى Amideast القاهرة فى الدقى الساعة 8:30 قبل الموعد بنصف ساعة ... بدء الامتحان متاخر عن موعده ب 10 دقائق للتنبيه على تعليمات الامتحان ... طريقة حساب الوقت كالتالى :

يتم توزيع ورق الاسئلة على كل الممتحنين. ورق الاسئلة عبارة عن كراسة كاملة مغلقة بلاصق . و يتم توزيع ورق الاجابة على الممتحنين ايضا و هو عبارة عن ورقة واحدة فيها دوائر لتسويد الاختيارات ...

بصرف النظر عن ان المركز ده كان سىء جداا و المعاملة كانت سيئة و لكن الدرس و النقطة الجيدة الوحيدة المُستفادة فى حساب الوقت..

بعد ان يتم توزيع الورق... يتم شرح تعليمات الامتحان و هو كلام عام عن الشروط و الاحكام للامتحان ... بعدها تقوم المراقبة بضبط الساعة (Count down watch)  للعد التنازلى على 2 ساعة و 50 دقيقة بالضبط و تأمر الحضور بقطع اللاصق و البدء فى الحل .. الساعة دى كبيرة و فى مستوى نظر كل الحاضرين طوال وقت الامتحان.

يمر الوقت و اثناء الامتحان تٌخبرنا المراقبة انه مر ساعة .. ساعتين ... إلخ ...

فى لحظة انتهاء الامتحان تصيح المراقبة بصوت عالى "Leave your pencil and close your exam booklet". وقتها يجب عليك فعل هذا و إن لم تقم باتباع التعليمات فاعتبر ان امتحانك لاغى . النقطة دى كانت اهم نقطة خبرة اكتسبتها من الامتحان ده ... عندنا فى الجامعة الالتزام ده مش موجود ... لما تبقى بتراقب ... ممكن توزع الورق على الطلبة فى اوقات مختلفة و تستلمه منهم فى اوقات مختلفة ... الفرق مش هيزيد عن 5 دقائق مثلا بس تخيل ان 5 دقائق ممكن تفرق فى النجاح و السقوط و ترتيب الطلبة ...

الالتزام ده بيحقق العدل بين كل الطلبة بالضبط .... و بيأكد ان الامتحان هو مقياس عادل بين كل الناس فى التقييم ما بينهم -اعنى العدالة فى الفرصة بصرف النظر عن جودة الامتحانات.

عادة سيئة ان يتم توزيع الامتحان و يبدأ الطلبة فى مواعيد مختلفة ... ثم ينتهى الزمن فيستمر الطلبة فى الكتابة حتى تسليم الورقة ... هذا يٌسبب فوضى .. يٌعطى فرص للغش .. يحطم تكافؤ الفرص فى الوقت حتى لو على دقيقة ...

تدريب ... من اول يوم 1-4-2013 .. بدأت اطبق طريقة التوزيع و سحب الورق على الطلاب ...
1- توزيع الورق مقلوب على كل الدفعة ...
2- اعلان وقت الامتحان و التنبيهات ..
3- اعطاء اشارة البدء ..
4- التنبية على الوقت المتبقى ..
5- اعطاء اشارة النهاية و عدم السماح لاى طالب باستكمال الحل بعد نهاية الوقت ..
6- لم الورق ..

الموضوع ممكن يكون هايف اووى بس فعلا كل اللى هيمتحن امتحانات دولية هيشوف ده و هيتعلم ده .. بس ليه يتعلمه على كبر ... ما يتعلمه و هو صغير علشان يتعود عليه ...  الالتزام مهم يا سادة ... العدالة فى القليل مهمة لانها تسمح بالعدالة فى الكثير فيما بعد

شكرا ...
فيكتور زخارى ..
 1-4-2013