عن العمل مع الله اكتب ...عن الانسانية اتحدث ...
شوية حاجات بسيطة لو عملتها هتنبسط اووووى .... الحاجات دى مش لازم تكون متدين علشان تعملها ... ممكن تكون مش مؤمن بربنا اصلا بس لو عملتها هتنبسط اوووى ....
نجلس نتناول العشاء في روسترى او سبكترا ... و نطلب الحساب فنترك بقشيش 5 او 10 جنيه فوق الحساب اللى هيطلع في حدود 200 او 300 جنيه لو انتم 2 او 3 و نيجى على عيل صغير في الشارع مش لاقى التراب نقله الله يسهلك ... بص جرب كده تخصص جزء من البقشيش ده او بلاش سيب شوية فكه من اللى لو وقعوا منك مش هتحس بيهم و اى عيل طحنته الدنيا او اى كهل انتهى بيه الامر انه يقول يا باشا و انت اصغر من ابنه .... اديله نص جنيه او جنيه ... مش هيفقرك او يأثر معاك بس حتما هيفرق مع اللى اخده ...
نتناول الغذاء او العشاء في مطعم فاخر او مطعم مصرى اصيل .. عشاء اطباق من الاكل ... و سلطات و خلافه ... شبعت ... تترك الاكل يترمى و هتحاسب عليه و تمشى ... طيب بص اعمل اللى هقولك عليه افيد ... لو الاكل ممكن يتلف ... لفه و اديه لاى حد قاعد في الشارع .... طيب مش ممكن يتلف ولازم يتغمس زى طبق فول مثلا ... حطه في سندوتشات و اطلب من الراجل كيس نظيف ... و اعطيه لاى حد محتاج في الشارع ... الاكل الزيادة في بيتك ممكن تعمل فيه كده ...
طيب ممكن تعمل حاجة اجمد و دى انا شخصيا قررت اعملها بعد الفطار ... خد اى طفل معاك و ادخل بيه المطعم اللى هتأكل فيه ... خليه يطلب اللى هو يحبه ... هو طموحه مش هيبقى كبير بس صدقنى انت بتديله فرصه من حقه يعيشها ... كل معاه و ادفع الحساب و امشى ...
كل اللى فوق ده مش صعب و مش مكلف .. مجهود زيادة شوية بدل الاهمال ... بس هتسعد حد معاك و هتعمل للانسانية .. و لو انت مؤمن بربنا فأنت كده بتشتغل معاه ... جرب و هتنبسط ...
فيكتور زخارى ...
29-04-2013
ليست هناك تعليقات:
إرسال تعليق